जमीर खलफे-रत्नागिरी
देवरूख येथे खासदार नारायण राणे यांच्या वाढदिवसानिमित्त भव्य बैलगाडी शर्यत उत्साहात संपन्न
रत्नागिरी: रत्नागिरी-सिंधुदुर्ग लोकसभा मतदारसंघाचे लोकप्रिय खासदार नारायण राणे यांच्या वाढदिवसानिमित्त करंजाडी येथे भव्य बैलगाडी शर्यतीचे आयोजन करण्यात आले होते. या रोमांचक कार्यक्रमाचे उद्घाटन स्वतः खासदार नारायण राणे यांनी फीत कापून केले.
यावेळी व्यासपीठावर राज्याचे मत्स्य व्यवसाय मंत्री तथा आमदार नितेश राणे आणि आमदार निलेश राणे यांच्यासह अनेक मान्यवर उपस्थित होते. खासदार नारायण राणे यांनी आपल्या भाषणात मुक्या जनावरांना कोणत्याही प्रकारचा त्रास होणार नाही याची काळजी घेऊन ही स्पर्धा आयोजित करावी, अशी अपेक्षा व्यक्त केली.
या बैलगाडी शर्यतीत रत्नागिरी जिल्ह्याभरातील तब्बल 110 स्पर्धकांनी उत्स्फूर्तपणे सहभाग घेतला. पारंपरिक वेशभूषेत सजलेल्या बैलांच्या आणि त्यांच्या मालकांच्या उत्साहाने परिसरातील वातावरण भारून गेले होते. ही चित्तथरारक स्पर्धा पाहण्यासाठी जिल्ह्याच्या कानाकोपऱ्यातून हजारो नागरिकांनी करंजाडी येथे मोठी गर्दी केली होती.
बैलगाड्यांच्या धावण्याने आणि नागरिकांच्या जल्लोषाने संपूर्ण परिसर दणाणून गेला होता. अनेक नागरिकांनी पारंपरिक वाद्ये वाजवून स्पर्धकांना प्रोत्साहन दिले. या स्पर्धेमुळे ग्रामीण भागातील लोकांमध्ये उत्साहाचे वातावरण निर्माण झाले होते.
खासदार नारायण राणे यांच्या वाढदिवसानिमित्त आयोजित केलेली ही बैलगाडी शर्यत यशस्वीपणे पार पडली आणि उपस्थित नागरिकांनी या अनोख्या कार्यक्रमाचा आनंद घेतला.
