छ.संभाजीनगर /वैजापूर
येथील एका पतसंस्थेकडून कर्ज म्हणून घेतलेल्या रकमेच्या परताव्यासाठी दिलेला धनादेश न वटता अनादरीत होऊन परत आल्या प्रकरणी आरोपीस ६ महीने सश्रम कारावास तसेच ७५ हजार रुपये नुकसाभरपाई फिर्यादी पतसंस्थेस द्यावी असे आदेश प्रथम वर्ग न्यायदंडाधिकारी श्री. डी. एस. पिसाळ यांनी दिले.
याबाबत अधिक माहिती अशी की, येथील वैजापूर नागरी सहकारी पतसंस्था मर्यादित यांचे कडून आरोपीने २५ डिसेंबर २०१७ रोजी ५० हजार रुपये कर्ज घेतले होते.
असे की, कर्जाऊ घेतलेल्या रकमेची ठरल्याप्रमाणे परतफेड न केल्यामुळे फिर्यादिने आरोपीकडे सदर रकमेची मागणी केली तेंव्हा आरोपीने फिर्यादी पतसंस्थेच्या नावाने दि. ३१ डिसेंबर २०१८ रोजीचा रक्कम रूपये ५९,४४२ चा औरंगाबाद जिल्हा मध्यवर्ती सहकारी बँक शाखा वैजापूर ता. वैजापूर चा धनादेश दिला. सदरचा धनादेश फर्यादिने लोकविकास नागरी सहकारी बँक लि. औरंगाबाद शाखा वैजापूर ता. वैजापूर येथे वटविण्यासाठी टाकला.
परंतु पुरेशा रकमेअभावी आरोपीने दिलेला धनादेश न वटता अनादरित होऊन परत आला. धनादेश न वटता अनादरित होऊन परत आल्यानंतर फिर्यादिने आरोपीस नोटीस पाठवून अनादरीत झालेल्या धनादेशाची रक्कम जमा करण्यास सांगितले होते.
परंतु नोटीस मिळूनही आरोपीने धनदेशाची रक्कम मुदतीत जमा केली नाही. त्यामुळे फिर्यादीने आरोपीविरुद्ध वैजापूर येथील न्यायालयात धाव घेऊन ॲड. मजहर बेग यांचेमार्फत चलनक्षम दस्तऐवज कायद्याचे कलम १३८ नुसार फिर्याद दाखल केली होती.
न्यायालयाने उपरोक्त प्रकरणातील परिपूर्ण फिर्याद, साक्षीपुरावा व फिर्यादीच्या वकिलांनी केलेल्या प्रभावी युक्तिवादाच्या आधारावर न्यायालयाने आरोपीस वरीलप्रमाणे दणका दिला. प्रकरणात फिर्यादी पतसंस्थेतर्फे ॲड. मजहर बेग यांनी काम पाहिले.
